Ginpasakaan sang Bureau of Jail Management and Penology ang padya sa makatudlo sa duha pa nga nabilin nga pugante sa Negros Occidental District Jail nga sanday Alejandro Montoya kag Francisco Epogon.
Suno kay Jail Chief Inspector Jairus Anthony Dogelio, tagpamaba sa Bureau of Jail Management and Penology (BJMP) Region 6, ang reward ang ginhimo nga P15,000 gikan sa P10,000 sa kada isa agud nga mas madasig nga madakop ang mga pugante.
Ginalantaw naman nga may posibilidad nga magsaka pa ang reward kun indi pa sa gihapon madakop ang duha.
Nagapati naman si Dogelio nga indi patal ang pilas ni Alejandro Montoya na natiruhan sa Sitio Catabla, Barangay San Fernando, Talisay City kun sa diin napatay ang kaupod sini nga pugante nga si Danilo Celeste.
Nagapati man si Dogelio nga nagapanago sa mga abyan niya ang pugante kag nagapaayo.
Sa pihak nga bahin, wala ginpangalanan ang lima ka mga jail guards nga on duty sang natabo ang pagpalagyo sa NODJ bangod wala pa matapos ang imbestigasyon.
