Ginalantaw sang Bureau of Fire Protection nga electrical in nature ang kabangdanan sang pagkasunog sang isa ka bahin sang Saint Vincent Ferrer Parish Church sa Barangay Vito, Sagay City kagab-i.
Suno kay Fire Officer 3 Andy Banasing, shift supervisor sang Sagay City Fire Station, nakabaton sila sang fire call alas-11:17 kagab-i.
Pag-abot sa lugar, nakit-an sang mga bombero nga nagsugod ang sunog sa nawala nga bahin sang altar kun sa diin nahamtang ang gamit sang choir kag sound system sang simbahan kag nagkamang ang kalayo pasaka sa kisame.
Bangud human sa hard wood ang kisame sang simbahan, wala ini gilayon nga nalamon sang kalayo.
Napilitan naman ang mga bombero nga buksan ang kisame bangud diri naglatay ang kalayo.
Suno kay Banasing, nagdangat lang sa first alarm ang sunog kag napalong ang kalayo makaligad ang pila ka minutos matapos magresponde ang Escalante City Fire Station.
Suno diri, wala sang casualty sa sunog apang ginabanta nga nagadangat sa P50,000 ang balor sang halit nga ginbilin diri.
Sa pag-usisa, natukiban nga nagasaksak pa sa outlet ang amplifier sang simbahan.
