Ginpahayag ni Bacolod City Administrator Em Ang nga magaabot sa Hulyo 16 ang una nga batch sang 650,000 doses sang AstraZeneca vaccine nga gin-order sang ciudad.
Sa interview sang Bombo Radyo kay Ang, ginpahayag sini nga may ginhatag na nga volume ang kumpaniya kun pila ang magaabot apang indi lang sini anay pag-idisclose bangud posible pa ini nga madugangan.
Suno sa iya, indi substantial ang volume sang bakuna nga magaabot sa Biyernes.
Naintindihan man sini ang ila kabudlayan sa production sang vaccine bangud sa madamo nga demand sa bilog nga kalibutan.
Suno sa iya, may commitment ang Oxford-AstraZeneca nga kada bulan may magaabot nga delivery.
Samtang ginpahayag man sini nga nadiskusyunan na sang Emergency Operations Center ang tuhoy sa IATF Resolution No. 25 nga nagapahanugot sa mga naga-edad lima ka tuig pasaka nga magwa sa mga lugar nga napaidalum sa general community quarantine kag modified GCQ depende sa local government unit.
Suno sa iya, nahisugtan sang ciudad nga indi pa ini pag-iimplementar bangud sa padayon nagasaka nga kaso sang infections.
Sa karun magapabilin nga ginadumilian sa pagwa ang mga menor de edad kag senior citizens.
