Ginahulat pa sang probinsya sang Negros Occidental ang AstraZeneca vaccines nga pagagamiton bilang second dose sa mga una na nga nakapatublok sang nasambit nga bakuna.
Sa interview sang Bombo Radyo kay Dr. Jessica Fama, medical specialist sang Provincial Health Office, ginpahayag sini nga subong nga bulan, may yara sila sang ginapaabot nga dugang nga set sang AstraZeneca COVID vaccine nga pagagamiton bilang second dose.
Suno sa iya, ang una nga mga doses nga nag-abot sa probinsya ang naubos gid tublok bilang first dose kag may approval man ini nagikan sa Department of Health.
Ginpahayag man sini nga may assurance man nagikan sa DOH nga may madugang nga doses sini nga bulan kun sa diin amu man ang schedule sang pag-angkon sang mga vaccinees sang second dose.
Samtang, wala naman sang problema sa mga nabakunahan sang Sinovac vaccine bangud may napartinisir na nga supply para second dose sini.
