Ginakasubo ni Bacolod City Mayor Evelio “Bing” Leonardia ang pagtaliwan ni Atty. Simplicio “Sammy” Palanca.
Sa statement nga ginpagwa ni Leonardia, ginpahayag sini nga nadula ang isa ka extraordinary nga lalaki.
Suno sa alkalde, si Palanca ang isa ka pinasahe nga persona kay isa ini ka tawo nga may vision nga indi kaangay sang iban.
Sang 1960s, si Palanca ang nag-envision sang reclamation area nga wala naglaom ang kadam-an nga mangin dako ang impact sa ciudad.
Suno sa iya, si Atty. Palanca ang nagbag-o sang landscape sang Bacolod literally kag figuratively.
Mabudlay suno diri nga ilaragway ang bacolod nga wala sang reclamation area kag ginpahayag sini nga si Palanca ang dapat nga hatagan sang credit diri.
Gintawag niya si Uncle Sammy nga “a man who saw tomorrow”.
Sa karun, gina-enjoy sang mga pumuluyo ang “tomorrow” nga gin-envision ni Palanca pila ka tuig na ang nakaligad.
Gindugang pa sang alkalde nga ang Bacolod ang indi mangin kun ano man ini sa karun kun indi bangud kay Uncle Sam.
Gani nagpasalig ini nga pagadumdumon gid sang ciudad ang tanan sini nga hinimuan kag tuman gid kadako ang pasalamatan sang Bacolod sa iya.
