Aminado si Negros Occidental Governor Eugenio Jose ‘Bong’ Lacson nga mangin konsiderasyon ang Delta variant sang coronavirus sa pagbyahe sang mga tapasero sang tubo nagikan sa Antique pasulod diri sa probinsya.
Nahibaluan nga linibo ka mga pasahero nagikan sa Antique ang nagasulod sa Negros Occidental kada tuig bangud didto nagakuha sang obreros ang mga landowners.
Sa interview sang Bombo Radyo kay Lacson, madali nalang ang milling season kag nagpahibalo na sa iya si SRA board member Atty. Dino Yulo nga ginahitso na ang pag-hire sang mga tapasero kag ginadihon naman ang proseso agud masiguro nga sila ang COVID free.
Aminado si Lacson nga dependent ang Negros Occidental sa mga tapasero nagikan sa Antique bangud kun wala sila, may dako gid nga problema sa sugar industry sang probinsya.
Bangud may duha ka kaso sang Delta variant sa Pandan, Antique, ini ang igakonsiderar sang provincial government sa pag-abot sang mga tapasero.
Sang tinalikdan nga tuig suno kay Lacson, wala man sang nagpositibo sa mga tapasero apang kinahanglan nga mangin mas istrikto sa karon.
Ang swab test suno sa chief executive ang sabton sang provincial government, apang welcome man kun mabayad diri ang mga landowners nga nag-hire sa ila.
