Nagpanugyan ang Philippine Coast Guard sa mga may transaksyon sa isla sang Panay nga mas maayo nga hingalitan ang kahigayunan nga magtabok samtang wala pa sang executive order angot sa suspension sang byahe.
Sa interview sang Bombo Radyo kay Capt. Ludovico Librilla, commander sang Coast Guard Station Negros Occidental, normal pa subong ang byahe sang fastcraft kag roro vessels bisan ginpaidalom sa enhanced community quarantine ang ciudad kag probinsya sang Iloilo bangud wala pa sang mandu angot sa suspension sang non-essential travel.
Ang first trip sang fastcraft ang nagabiya sa BREDCO Port alas-5:30 sang kaagahon samtang 24 oras naman ang byahe sang roro vessels.
Suno kay Librilla, nagapakig-angot ang PCG Negros Occidental sa PCG Iloilo agud mahibaluan gilayon kun may executive order si Iloilo City Mayor Jerry Treñas kag Iloilo Governor Toto Defensor, agud mapahibalo gilayon ang mga shipping lines.
Sa karon, diutay lang ang mga pasahero suno kay Librilla kag rolling cargoes ang kalabanan nga karga sang barko.
Samtang wala pa sang EO suno sa PCG official, mas maayo nga hingalitan sang may importante nga transaksyon sa Panay nga ini ang makatabok bangud mahimo nga magagwa ang EO angot sa suspension anuman nga oras.
