Ginkumpirmar sang Civil-Military operations sang Philippine Army nga tatlo tubtob apat ka mga engkwentro ang nagluntad kahapon sa tunga sang South West Front sang New People’s Army kag 15th Infantry Battalion sa Barangay Caningay banwa sang Candoni.
Sa interview sang Bombo Radyo kay 2nd Lt. Weann Sandag, kapin 30 tubtob 40 ka mga ginaalegar rebelde ang naka-engkwentro sang mga militar kahapon kun sa diin asod-asod ang mga pagbayluhanay sang luthang nga nagluntad.
Suno sa iya, may posibilidad nga nakaangkon sang pilas ang mga NPA bangud may nakit-an sila nga blood stains sa lugar apang wala naman sang may narecover nga bangkay ukon lawas.
Wala naman sang may nasamaran ukon napilasan sa bahin sang gobyerno.
Nag-evacuate naman ang mga residente sang lugar kag nagpadulong anay sa ila mga himata kag nagpreparar man sang relief goods ang barangay.
Sa karun nagapadayon pa ang clearing operation sang mga militar sa lugar.
