Nakabaton na ang Bacolod City Fire Station sang safety seal certification nagikan sa Department of the Interior and Local Government.
Suno sa fire marshal nga si Fire Chief Inspector Rodel Legaspi, nagpagwa sang direktiba ang DILG nga macomply ang mga fire stations sa safety seal kadungan sang COVID pandemic kun sa diin may mga guidelines nga dapat sundon.
Sa idalom sini, may yara sang designated nga safety officer sa opisina nga in-charge sa pagcheck sang body temperature sang mga tawo nga nagatransaksyon, nagasanitize kag nagascan sang QR code ukon nagapafill out sa logbook.
Nagmandu man ang DILG nga magtalana sang isolation room nga tiniran sang personnel nga nagalain ang pamatyag ukon nagapakita sang sintomas sang COVID-19.
Makaligad ang duha ka semana nga pagcomply sang yara sa checklist sang DILG, nabaton na sang Bacolod City Fire Station ang safety seal certification.
Suno kay Legaspi, frontliners man ang BFP personnel bangud may mga tawo nga nagatransact sa opisina kada adlaw kag nagapatigayon man sang disinfection sa mga establisyimento kag sa barko nga nagaabot sa puerto.
Nagalaom ang fire marshal sang Bacolod City Fire Station nga mabuligan sila sang city government kag sang regional office nga madugangan ang sub-stations sa ciudad.
Suno kay Fire Chief Inspector Rodel Legaspi, may yara sang pito ka fire sub-stations sa ciudad kag nahamtang sa Barangay Mansilingan ang pinakaulihi nga natukod.
Nagaplano si Legaspi nga mag-expand sang sub-stations sa norte nga bahin sang Bacolod bangud nakita sa work planning suno sa iya nga mahina ang response sa northern part sang ciudad.
Ini bangud nga halos kalabanan nga sub-stations ang nahamtang sa karon sa sur nga bahin sang Bacolod.
Ginatinguhaan sang BFP Bacolod ang expansion suno sa fire marshal kag nagalaom si Legaspi nga makabulig diri ang city government kag ang Bureau of Fire Protection Region 6.
