Ginkumpirmar ni Bacolod City Administrator Em Ang nga nagdangat na sa apat ang kaso sang Delta variant sang COVID-19 sa ciudad matapos nagpositibo sa sequencing sang Philippine Genome Center ang duha ka mga persona nga residente sang Barangay Mansilingan.
Sa interview sang Bombo Radyo kay Ang, ginpahayag sini nga separado kag lain-lain nga kaso ang duha ka mga pasyente kun sa diin isa diri ang tatlo ka tuig nga bata nga lalaki kag 63-anyos nga babaye.
Suno sa iya, ang tatlo ka tuig ang nalatnan sang iya amay nga nagatrabaho sa bangko samtang ang 63-anyos ang nalatnan sang iya apo nga nagatrabaho sa isa ka telecommunications company sa Bacolod.
Nagpasalig naman ang city administrator nga nag-ayo na ang duha bangud Hulyo 15, 2021 ginswab ang tatlo ka tuig nga lalaki samtang Hulyo 23 naman ang 63-anyos nga fully vaccinated naman sang Sinovac vaccine.
Lunsay natapos na sang duha ang ila 14 days quarantine.
Wala man sang dapat kahangaw-an suno sa iya bangud lunsay nakarecover na ang duha.
Gindugang man sini nga sang nabaton ni Mayor Evelio “Bing” Leonardia ang resulta nagikan sa PGC, gilayon ini nga nagpatuman sang surgical lockdown kag nagpatigayon sang contact tracing.
Nagpanugyan naman ang local government sa mga Bacolodnon nga magpabilin nga vigilante kag magsunod sa mga health protocols.
