Nagapadayon sa pagpanglista ang City Government sa mga market vendors nga luyag magpavaccine nga wala nalakip sa ginpatigayon sang VAX-i ukon vaccination taxi sang nagligad nga semana sa tatlo ka mayor nga mga merkado diri sa Bacolod.
Sa interview sang Bombo Radyo kay Executive Assistant to the Mayor Ernie Pineda, ginpahayag sini nga igalakip naman ang pamilya kaangay sang asawa, bana kag mga kabataan sang mga market vendors sa mga igacater sang VAX-i agud tanan sila sa panimalay ang mavaccinate.
Suno kay Pineda, naga-organisa naman sa karun ang mga PUJ drivers, taxi drivers, tricycle kag trisikad drivers kag nagapangita sang lugar nga sarang mapadulungan sang VAX-i agud mabakunahan ang ila mga miyembro.
Suno sa iya, ang ini nga konsepto nga ginbalay ni Mayor Evelio “Bing” Leonardia paagi sa Emergency Operation Center kag CoVac Council, agud indi na mag-usik pa sang tiyempo ang remedio heneral sa pagpadulong sa mga vaccination centers bangud ang bakuna nalang ang magapalapit sa ila.
