Nagalapta sa karun sa international media ang isyu nga posible katapusan na nga hampang subong nga adlaw ni Manny Pacquiao.
Gina-istoryahan sa karun ang posibilidad nga ini ang magaretiro na sa halos tatlo ka dekada nga career sini ilabi na kun siya ang mapierde sang Cuban champion nga si Yordenis Ugas.
Mas nag-init ang isyu sang mismo si Pacquiao, 42 anyos, ang nagpabutyag nga posible ini na ang iya katapusan nga hampang.
Sa isa ka interview sang Bombo Radyo, ginpahayag sini nga posible ini na ang katapusan sini nga hampang ukon may tiyansa nga may magasunod pa.
Ginalantaw naman sang pila ka mga observers nga madaog man ukon mapierde si Pacquiao, sigurado nga madala na ini sa mga Hall of Fame boxers.
Sa 26 ka tuig nga boxing career sang fighting senator, nagdangat na sa 24 kag sa karun world champions ang wala sang kahadlok sini nga gin-atubang sa ring.
Kun magdaog gid man si Pacquiao, malapawan sini ang iya kaugalingon nga rekord bilang oldest welterweight champion sa kasaysayan sang kalibutan kag naga-isahanon nga 5-time welterweight champion magluwas sa iya pagka-eight division welterweight champion.
Samtang, nagpangabay naman si Mayor Evelio “Bing” Leonardia sa mga Bacolodnon nga pangamuyuan kag suportahan si Senator Manny Pacquiao sa iya hampang subong nga adlaw.
Sa ginpagwa nga statement sang alkalde sini nga kaagahon, ginpakigbahin sini nga apisar nga luyag niya nga maglantaw sang hampang sang Senador sa Estados Unidos, kinahanglan sini nga magpabilin sa Bacolod kag magfocus sa pagpakigbato sang ciudad batok sa COVID-19.
Suno diri, iya na ginpalab-ot sa alkalde ang iya sentimento kag sigurado ini nga iya ini naintindihan kaangay man sang iban nga mga opisyal nga sadto nagasuporta sa iya sa Las Vegas.
Sa karun suno kay Leonardia, nakahigot ang ila kamot sa pagmanage sang health crisis apang nagaupod ang Bacolod City sa nasyon nga nagalaom sa Adopted Son sang ciudad, sang iya kadalag-an sa iya WBA title bout subong nga adlaw.
