Yara na sa estable nga kondisyon ang isa ka negosyante sa Bagsakan 3, Barangay 40, matapos nga gintiro sang isa ka motor riding suspect kaina alas-3:40 sang hapon.
Ang biktima ang ginkilala kay Rey Bebillo, 46 anyos residente sa Cagayan de Oro, apang sa karun nagapuyo sa isa ka apartment sa Barangay Taculing.
Suno sa empleyado sang biktima nga ginkilala kay Rodgen Olero, nagaseparar ang mga ini sang produkto nga repolyo sang natabo ang insidente.
Nakabati nalang ang mga ini sang lupok apang wala nakita ang hitabo.
Pahayag sini nga ginsulod sa iya nga pwesto sang suspetsado ang biktima kag didto na ginluthang.
Suno kay Olero, sa ila pa pwesto naglabay ang suspetsado nga nakasuksok sang kalo kag nakanapton sang blue nga tshirt.
Gilayon naman nga nagsakay sa motorsiklo ang suspetsado kag nagpalagyo.
Ginsundan naman ini sang isa sa kaupod nga empleyado.
Suno naman kay Police Major Leo Estopa, station commander sang Bacolod Police Station 6, padayon pa nga ginabulong ang biktima sa ospital apang estable na ang kondisyon sini.
Suno sa iya, nagapadayon pa ang ila imbestigasyon sa insidente.
Sa interview sang Bombo Radyo kay Resthy Dela Cruz, abyan sang biktima, nga amo ang nagbulig sa biktima padulong sa ospital, nga kasunod sa pagpangluthang, nakita sini nga nagadalagan si Bebillo pagwa sa pwesto samtang nagakapot sa leog sini nga naigo sang bala.
Nagsakay naman ini sa tricycle kag nagpangayo sang bulig sa iya nga updan ini agud nga magpabulong.
Suno kay Dela Cruz, gindala sini ang biktima sa Bacolod Adventist Medical Center.
Si Dela Cruz, nga residente sa Nueva Ecija kag nagapuyo sa karun sa Barangay Mansilingan, Bacolod City, ang madugay naman nga abyan sang biktima.// Ini amo ang supplier ni Bebillo sang utan nga ginakuha pa gikan sa Baguio.
Maayo naman ang pagkakilala sini sa biktima kag masami nya lang ini nga makita nga nagapungkuon.
Sa karun suno sa iya, maestorya na ang biktima kag ginalantaw man sini ang posibilidad nga nakilala sini ang nagluthang sa iya.
