Nakilala na ang napatay nga Amazona ukon female fighter sang New People’s Army (NPA) sa nangin engkwentro sa militar sa Barangay Kapitan Ramon, Silay City sang Biyernes.
Ang biktima ang ginkilala kay Kerima Lorena Tariman alyas Ka Ella ukon Em-Em, 42 anyos kag tumandok sa Legaspi City, Albay.
Ini ang isa man ka writer kag nagabuhat sang mga poem sadto apang sa karun ginakabig na nga lider sa NPA sa northern Negros.
Suno kay Brig. Gen. Inocencio Pasaporte, Commander sang 303rd Infantry Brigade, ginkumpirmar nila ang identity sang biktima gikan sa lainlain nga mga sources.
Ini ang ginakabig nga pinuno sang pwersa sang Northern Negros Front sang NPA sa bahin sang Silay, Talisay kag Victorias City.
Ini ang graduate sa UP Diliman kag anay isa man ka scholar bangod sa pagsulat sini.
Suno kay Pasaporte, sa pagsulod sini sa Communist Party of the Philippines-New People’s Army-National Democratic Front (CPP-NPA-NDF) makita man nga kaangay lang sa gihapon sadto ang estraktura kag kultura sang makawala nga grupo.
Gina-engganyo sang mga ini nga mag-upod sa ila ang mga indibidwal may kaangtanan sa ginapanindugan nga hublag tubtob sa pasakaon na ang mga ini sa bukid para sa armado nga pagpakigbato.
Nakanugunan naman si Pancito bangod talentado ilabi na sa poem writing si Ka Ella, apang napatay ini sa butang nga indi naman kinahanglan pangimatyan.
Ginakasubo man sini ang rasun kun ngaa nagsulod pa ang biktima sa armado nga pagpakigbato.
Nagapalab-ot man ang militar sang pagpakig-unong sa pamilya sang nadulaan kasubong man sa napatay nga ginkilala kay Ka Pabling.
Samtang ginpakigbahin man ni Pasaporte nga pila sa mga anay NPA nga nagsungka na sa gobyerno ang nagapahayag nga si Ka Ella man ang anay nagrecruit sa ila kag ini ang nagadumala sa karun sang Northern Negros Front.
Nagapati si Pasaporte nga wala sang makita ang NPA nga lokal nga residente nga may ikasarang sa pagpamuno gani nagapadala ang mga ini sang gikan sa iban nga lugar.
Dugang pa sang militar nga ginkilala man mismo sang amay sini si Tariman.
Samtang ang militar naman nga nadulaan sang kabuhi nga si Private First Class Christopher Alada ang ginbyahe na papauli sa iya nga banwa sa Badiangan, Iloilo.
