Nagapasalamat si anay national team boxer Mansueto “Onyok” Velasco sa nabaton sini nga recognition nagikan sa Malacañang sang Lunes kaupod ang mga Tokyo Olympic medalists.
Sa interview sang Bombo Radyo kay Velasco, ginpahayag sini nga tuman ang iya kalipay nga siya ang nahatagan sang Order of Lapu-Lapu nga award kag Rank of Kamagi magluwas sa P500,000 cash incentives para sa iya kadalag-an bilang silver medalist sa 1996 Atlanta Olympics.
Suno kay Velasco, bonus lang ang cash nga iya nabaton nagikan sa Office of the President apang ang Order of Lapu-Lapu ang ginakabig sini nga pinamataas nga award bangud ini ang sarang nga mapasubli sa iya mga kabataan kag sa masunod nga henerasyon.
Ginpakigbahin sini kun paano sila isa-isa nga gintawag sa Malacanang sang Lunes kag gincongratulate ni Presidente Rodrigo Duterte kag sang mga opisyal.
Ginpasalamatan man sini si Senator Bong Go nga amu ang nagbulig agud mabaton sini ang incentives nga ginpromisa sang Kongreso.
Ginakalipay man sang Negrense boxer nga nakaupod sini ang iban nga mga Tokyo Olympics awardees kag ginpahayag nga indi man madumduman ang iya kadalag-an kun wala ang mga ini nagdaog sang medalya para sa pungsod.
Nagpanugyan si Velaso sa mga aspiring boxers nga magtraining gid sang maayo, indi magpabaya kag mangin disiplinado bangud kun may displina, suno sa iya, mahapos lang nga malab-ot ang target.
