Patay ang isa ka drug personality sang Kabankalan City matapos ginluthang sang wala pa makilal-an nga mga suspetsado sa Crossing Antipulo Lubi, Barangay Talaban, Himamaylan City.
Sa interview sang Bombo Radyo kay Police Lt. Arturo Margallo Jr., deputy chief sang Himamaylan City Police Station, ginkilala ang biktima kay Marvin Diansen, 30 anyos, resiente sang Purok Casuy, Barangay Mambagaton, Himamaylan City.
Suno kay Margallo, sa ila inisyal nga impormasyon, naclassify nga drug personality kag drug pusher sa ciudad sang Kabankalan si Diansen kag sa karun under probation.
Suno diri, pagbaligya ukon pagsupply sang kawayan ang trabaho sini.
Nagabyahe ang biktima sang ginparahan ini sang wala pa makilal-an nga suspetsado sa Crossing Antipulo Lubi.
Bangud nga masami ini nga nagatransact sang kawayan sa lugar, wala ini nagduha-duha kag nagpondo apang hinali na lang siya nga ginluthang.
Nakaangkon ini sang igo sa ulo kag narecover sa lugar ang 10 ka fire cartridge sang .45 caliber kag duha ka fire bullet sang nasambit nga armas luthang.
Ginhingagaw naman si Diansen dala sa ospital apang gindeklarar nga dead on arrival.
Sa karun nagapadayon pa ang imbestigasyon sang kapulisan tuhoy sa insidente.
