Naactivate na ang Special Investigation Task Group nga magatutok sa imbestigasyon sa pagtiro-patay kay Police Staff Sergeant Joseph Nepomuceno sa Barangay 38, Bacolod City sang Agosto 29.
Sa interview sang Bombo Radyo Bacolod kay Bacolod City Police Office director Police Colonel Manuel Placido, naactivate na ang SITG nga magabulig sa Bacolod City Police Station 1 sa imbestigasyon.
Samtang nagpasalig man si Placido nga may mabaton nga award si Nepomuceno bilang paghatag sang honor sa iya.
Ginlaragway man sini nga maayo kag matutom nga klase sang police si Nepomuceno.
Sa pihak nga bahin nagpasalig ang hepe sang Bacolod Police Station 2 nga handa ang mga ini sa pagbulig sa Bacolod Police Station 1 sa pag-imbestigar sa pagpatay kay Glenn Paul Castillo sang tinalikdan nga Setyembre 1.
Suno kay Police Captain Vincent Paul Pendon, wala pa sila sang lead sa kaso ni Castillo bangud wala pa sa karun sang witness kag madulom man ang ginbilinan nga lugar.
Nagapanguna naman sa imbestigasyon ang Police Station 1.
Ginahulat man nila ang report sang SOCO kag wala man nagauntat ang tropa sa paglibot agud makakita sang posible nga witness sa nasambit nga krimen.
