Patay ang backrider sa isa ka motorsiklo matapos nga mabungguan sang nagasunod nga truck sa Bangga Padasas National Highway sa Barangay Poblacion, Valladolid, Negros Occidental.
Suno kay P/Maj. Wilfredo Benoman, hepe sa Valladolid Municipal Police Station, naluntad ang aksidente ala-1:40 kahapon sang kaagahon.
Ang biktima nga nadulaan sang kabuhi ang ginkilala kay John Francis Jake Perez, legal ang edad, single kag ang driver sang motorsiklo ang ginkilala naman kay Jeryl Matias, 31 anyos lunsay mga residente sa Barangay Taloc, Bago City.
Ang driver sang mitsubishi nga truck nga nakabunggo sa duha ang ginkilala naman kay Ernesto Sombrio, 54 anyos, tumandok sang San Jose Del Monte, Bulacan.
Suno kay Benoman, santo sa inisyal nga imbestigasyon, ang duha ka salakyan ang parehas nga nagadalagan gikan sa norte padulong sa sur nga dereksyon.
Nagluntad ang insidente sang hinali nalang nga ginbungguan sang truck ang likod nga bahin sang motorsiklo nga nagtuga sang pagka-aksidente sang duha.
Gilayon naman nga gindala sa Bago City Hospital ang mga biktima kun sa diin gindeklarar nga dead on arrival si Perez.
Samtang si Matias naman ang padayun pa nga ginabulong.
Nakahunong naman sa karun sa Valladolid Municipal Police Station ang driver sang truck.
Nahibaluan nga wala natalupangdan sang driver nga yara sa unahan sini ang motorsiklo kag nakibot nalang ini sang siya ang nakabunggo na.
Ginpakigbahin man ni Benoman nga may panibag-o nga driving law sila nga ginasunod, kun sa diin iga-subject sa drug test ang mga suspetsado sa isa ka vehicular accident.
