Wala sang tinutuyo nga mag-apelar ang Bacolod City Government sa bag-o nga quarantine status nga ginpagwa sang National Inter-Agency Task Force kun sa diin magapabilin sa General Community Quarantine with Heightened Restrictions (GCQ-HR) ang ciudad humalin Setyembre 8 tubtob Setyembre 30, 2021.
Sa interview sang Bombo Radyo kay Bacolod City Administrator Em Ang, ginpahayag sini nga antes magpagwa sang final announcement ang national government, nagapahibalo gid ang Department of the Interior and Local Government (DILG) sang community quarantine status kag ginahatag tiyansa ang ciudad tubtob alas 5:00 sang hapon agud makafile sang apelasyon.
Apang suno kay Ang, wala sang tinutuyo nga mag-apelar ang ciudad gani magasunod lamang sila sa ginhatag nga quarantine status.
Suno diri, wala man sang problema sa GCQ-HR bangud apisar nga ginpaidalum sa MGCQ sang nagliligad nga bulan ang ciudad, madamo gihapon sang ginpangdugang nga mga restrictions.
Nagapanugyan ini gihapon sa mga pumuluyo nga magkooperar, magsunod sa health protocols kag indi mahadlok nga magpabakuna.
Samtang, ginpakigbahin man ni Ang nga nakaschedule ang Emergency Operations Center nga makigsapol sa mga medical directors kag chief of hospitals agud diskusyunan ang infection control sa mga pribado kag pampubliko nga ospital sa ciudad.
Suno sa city administrator, ini bangud nga nagadamo sa karun ang mga personnel nga nagamasakit nga nagapositibo sa COVID-19.
Suno diri, ila pagaistoryahan kun paano malikawan ang transmission sa mga ospital agud malikawan man ang kakulang sa mga medical personnel.
Ila man pagatalakayon kun ano nga bulig ang mahimo sang local government subong man ang supply sang life saving medicines sa ciudad.
