Ginakasubo sang alkalde sa banwa sang Manapla nga siyam ka mga persona ang sunod-sunod nga napatay bangod sa COVID-19 infection.
Suno kay Mayor Manuel Escalante III, sunod-sunod lang ang mga nagkalamatay sa banwa kag ang mga ini ang lunsay wala nakapabakuna sa COVID-19 vaccine.
Aminado naman ang alkalde nga may isa sa siyam nga nakapabakuna na sang single dose sa COVID-19 vaccine apang wala na nagbalik para sa 2nd dose.
Emosyonal naman nga ginpakigbahin sang alkalde nga kalabanan sa ila banwa ang nagapili pa sang vaccine.
Sa karun, may kapin 3,800 na ka mga fully vaccinated individual sa Manapla apang ini ang 7 porsyento palang gikan sa masobra 55 mil nga populasyon.
Ini ang makabig naman nga manubo nga turn-out kun ipaanggid sa iban nga mga banwa kag syudad sa probinsya sang Negros Occidental.Ginpakigbahin man ni Escalante nga bilang alkalde, ang estratehiya sini amo ang mag-upod mismo sa mobile vaccination nga nagapatigayon sang pagbakuna.
Suno sa alkalde, kahapon nagpabakuna sila sa Barangay Purisima kag Baranagy Villarosa samtang ginatsekyar naman sini ang sitwasyon sang pagbakuna kag mga ginabakunahan.
Pahayag pa ni Mayor Escalante nga natalupangdan sini nga mas madamo pa sang pamatan-on nga mga nagapabakuna kun ipaanggid sa mga senior citizens kag mga middle age na.Ini ang suli naman sa gina-eskpektar nga kuntani ang mga may edad amo ang maga-impluwensya sa mga pamatan-on agud nga magpabakuna.
Ginhinambit mismo sang alkalde nga nakapoy na ini sa pasulit-sulit nga pag-engganyo sa mga pumuluyo nga magpabakuna apang wala ini sang mahimo bangod amo ang iya trabaho bilang alkalde.
Suno sa iya, kalabanan sa iya mga pumuluyo ang nagahulat pa nga magbatyag sang malala nga balatian.
Ginpakigbahin man sini nga wala na siya sang tiyempo agud trabahuon pa ang mga obligasyon sini sa opisina bilang alkalde bangod nagatutok ini sa pagbakuna sa iya mga pumuluyo.
Panindugan sini nga wala sang pulos ang pag-opisina sini kun ang mga pumuluyo sang banwa ang nagabalatian.
Ginpakigbahin pa sini nga ang mobile vaccination sini nga estratihiya ang sadto pa sini ginabuhat nga ang tinutuyo amo ang madala sa mga pumuluyo ang vaccination agud indi na ang mga malayo magpadulong sa sentro sang banwa.
Nagapati naman si Escalante nga dako ang mabulig sa mga may comorbidities agud indi ang mga ini matam-an kun sila ang magapabakuna.
Panindugan sang alkalde nga karera ang karun nga sitwasyon sa tunga sang COVID vaccine kag COVID-19 gani panugyan sini nga indi na dapat magkahadlok sa injection bangod ang dapat kahadlukan amo ang maunahan sang virus.
