Patay ang 18 anyos nga Grade 10 student matapos nga ginpaidalum sa hazing sang isa ka fraternity sa banwa sang San Enrique.
Suno kay P/Lt. Sammy Gasataya, deputy chief sang San Enrique Municipal Police Station, sang Setyembre 9 pa sang napatay ang estudyante apang sini lang nareport sa San Enrique Municipal Police Station nga ang kinamatay sini ang bangod sa hazing.
Nahibaluan nga ang estudyante ang ginrecruit sang tatlo sini ka mga abyan nga magsulod sa fraternity sang Marso 2021.
Ginpaidalum man ini sa initiation sadto apang wala ini matapos sang matukiban nga ini ang 17 anyos palamang kag wala pa sa legal nga edad.
Samtang nagselebrar naman ini sang iya ika-18 nga kaadlawan sang Setyembre 3 kun sa diin nagtambong man diri ang tatlo ka mga nagarecruit sa iya sa fraternity.
Ginpakigbahin man sang iloy sa mga kapulisan nga nag-inom pa ang mga ini alas-10:00 sang gab-i tubtob na sang alas-12:00 sang tungang gab-i.
Sang nagdangat ang alas-12:00 ginblindfold ini sang mga abyan kag gindala sa wala mahibaluan nga lugar kag didto na ginpatigayon ang hazing apang wala na makahibalo ang iya mga ginikanan.
Nakapauli naman ang estudyante ala-una na sang kaagahon sang Setyembre 4.
Suno sa iloy, natalupangdan na nila nga daw may lain sa paglakat sang ila anak apang wala na nila ini ginpadalman pa.
Tubtob sa nagreklamo na ini sang Setyembre 8 sa sakit nga iya ginabatyag kag ini ang ginahilanat na.
Bangod sa pagpinsar nga normal lang ini nga hilanat, ginhot compress lang nila ang biktima.
Apang sang kaagahon sang Setyembre 9, naglala na ang sitwasyon sang estudyante kag didto naman sini gintuad nga siya ang ginhazing.
Ang estudyante ang nadulaan sang kabuhi alas-6:00 sang aga.
Suno kay Gasataya, naggwa sa post mortem examination nga ang biktima ang nag-angkon sang hematoma sa buli, kun sa diin ang muscles sini ang nadunot na, samtang ang dugo naman ang nagdangat na sa iya nga kidney nga gintunaan sang iya kamatayon.
Sa karun, gina-imbestigaran na ang mga suspetsado nga nagrecruit sa estudyante, apang ginapanginwala man nila ang alegasyon.
Nagpahanumdom naman si Gasataya sa mga ginikanan nga indi pagpabay-an ang ila nga mga kabataan ilabi na nga magsulod sa mga grupo-grupo.
Ginahingyo man sini sa mga head office kag prinsipal sa mga eskwelahan, kun sa diin masami naga-umpisa ang recruitment nga ipahibalo sa San Enrique Municipal Police Station kun may nagakatabo nga kaangay nga aktibidad agud mabuligan ang mga kabataan.
