Nakapalagyo ang subject person sa drug buybust operation nga ginpatigayon sa Purok Maanyag 2, Barangay Alijis, Bacolod City apang nadakpan naman ang live-in partner sini.
Suno kay P/Capt. Elmer Bonilla, station commander sang Bacolod Police Station 7, ang subject sa buybust operation ang ginkilala kay John Paul Rodriguez, samtang ang live-in partner naman sini ang ginkilala kay Geraldine Erije, 22 anyos kag residente sa nasambit nga lugar.
Paathag sang hepe nga sang ginapatigayon na ang pagbakal sang iligal nga droga sa subject person, namutikan sini nga mga kapulisan ang iya ka-transaksyon gani ini ang gilayon nga nakapalagyo.
Ang suspetsado ang nakuhaan sang duha ka bulto sang suspected shabu nga ginabanta nagabug-at sang 10 ka gramos kag nagabalor P68,000.
Ang live-in partner sini ang nakahunong na sa karun sa kustodiya sang Bacolod Police Station 7.
Paathag ni Bonilla nga bisan nakapalagyo si Rodriguez, pagapasakaan ini sa gihapon sang kaso sa paglapas sang section 5 kag 11 sang Republic Act 9165 ukon Comprehensive Dangerous Drugs Act of 2002.
