Nangin tuman kainit ang atmosphere sa lobby sang Bombo Radyo Bacolod kadungan sang grand draw sang Enhanced Swerte sa Palengke, balde-baldeng papremyo na, may cash-siyahan pa kahapon sang hapon!
Nagikan sa nagabukid nga entries nga nagadangat sa kapin 100 mil halin sa week number 1 tubtub alas-12:00 sang udto kahapon, ginbunot ang mga winners sang dalagko nga papremyo.
Pinakamaswerte sa tanan si Maria Rhona Sambitan sang Purok Tangkong, Barangay 7, Bacolod City nga magabaton sang 20 mil pesos cash bilang first prize.
Nagabutan naman bilang second prize winner si Helen Palma sang Purok Paghidaet, Barangay 29, Bacolod City nga magabaton sang 10 mil pesos cash; samtang 3rd prize winner naman si Desiree Banquillo sang Barangay Baliwag, San Enrique, Negros Occidental nga magabaton sang cinco mil pesos cash.
Lima naman ka mga consolation prize winners ang ginpili kag sila ang magabaton sang tag-dos mil pesos nga cash.
Ini ang ginalakipan nanday Agripina Longakit sang Totong 4, Lunok Street, Barangay Felisa, Bacolod City; Noe Pahilagao sang Purok Santol, Barangay Mandalagan, Bacolod City; Mar V. Moses Jardinico sang Para 1, Taloc, Bago City, Negros Occidental; Ma. Armi Salvi C. Aleguin sang Purok Mahigugma-on, Barangay Pahanocoy, Bacolod City kag Sheila Ansag sang Crossing Martesan, Cadiz City.
Samtang, nangin emosyonal ang 1st prize winner sa grand draw sang Enhanced Swerte sa Palengke 2021 promo kahapon matapos mabatian nga siya ang nagabutan nga magabatun sang P20,000 cash nga premyo.
Dako ang pagpasalamat ni Maria Rhona Sambitan sang Purok Tangkong, Barangay 7, Bacolod City nga ginpamatian sang Ginoo ang iya nga nangin pangamuyo nga maselebrar ang kaadlawan sang iya iloy sa maabot nga Setyembre 22.
Si Sambitan ang housemain kun aga samtang salelady naman sa hapon.
Suno pa diri lima ka tuig na ini nga saleslady samtang 13 ka tuig naman nga nagatrabaho sa sulod sang balay.
Ang tagdaog ang single mom, kag ginasagod sini ang duha ka kabataan nga yara sa iloy sini sa ila puluy-an sa banwa sang San Enrique, samtang ang duha pa sini ka bata ang yara naman sa anay kahagugma.
Ginpakigbahin sini nga perme sila nga nagapamati sa Bombo Radyo sa ila nga trabaho gani nakatutok gid ang mga ini sa tion sang paglawag sang mga tagdaog.
Indi naman sini ma-eksplekar ang kasadya nga nabatyag kasunod sang gin-anunsyar ang pagkagabot sa iya nga pangalan kag ginpakigbahin sini nga tuman ka dako na ang mabulig sang iya nga nadag-an nga premyo.
Nagpangagda man ini sa iban nga mga tagpalamati nga magpasakop man sa mga masunod pa nga promo agud makadaog man kaangay sa iya.
Nagtumbo-tumbo naman sa kalipay ang 64-anyos nga tagdaog sang P10,000 bilang second prize winner sa grand draw sang Enhanced Swerte sa Palengke 2021 promo kahapon.
Suno kay Helen Palma sang Barangay Estefania, ini ang labing una nga kahigayunan nga siya ang nagdaog sa anum ka tuig sini nga pagpadala sang entries para sa mga promo sang Bombo Radyo.
Suno sa iya, manugpanyapon na sila kuntani sang iya nabatian ang iya pangalan gani tuman gid ang iya kalipay.
Suno diri, antes ang grand draw, may panagupnop ini nga siya ang magadaog gani nagbakal gid ini sang sobre kun sa diin nakahulog siya sang 18 ka mga sobre.
Apisar nga wala ni Palma nakuha ang ginahandum nga P1 million, tuman naman ang iya pagpasalamat sa P10,000 nga nadag-an.
Samtang tuman man ang pagpasalamat sang isa sa consolation prize winner nga magabatun sang P2,000 cash nga siya ang nalawagan nga isa sa mga tagdaog kahapon.
Suno kay Agripina Longakit sang Totong 4, Lunok Street, Barangay Felisa, Bacolod City, nagapasalamat ini sa Ginoo nga nakabahin siya sa mga consolacion prize winners.
Ginapasalamatan sini ang Bombo Radyo kag Star Fm, kasubong man ang tanan nga mga sponsors kag ginpangabay pa ang pagpadayun sang mga promos agud madamo pa sang mabuligan ang network.
Suno kay Longakit, igabakal sini sang dugang nga unod sa iya tyangge ang cash nga iya nadag-an.
