Ginkumpirmar sang punong barangay sa Barangay Tabu, Ilog, Negros Occidental nga nakasugilanon na sini ang Ilog Municipal Police Station para sa mga programa maykaangtanan sa sikolohikal nga aspeto sang mga kabataan kag mga pumuluyo sa lugar.
Ini ang kasunod sang nagluntad nga engkwentro sa tunga sang 6th Special Action Battalion sang Philippine National Police (PNP) kag New People’s Army (NPA) sa Sitio Balik-Balik, Barangay Tabu, banwa sang Ilog sang Setyembre 14.
Suno kay Punong Barangay Emily Trimucha, nga ginahulat nalang nila nga mafinalize na ang mga plano.
Paathag sini nga apisar nga wala nasamaran ang mga kabataan, nagapati ang kapitan nga mas importante nga ipaatubang ang mga ini sa psychiatrist ilabi na nga na-expose ang mga ini sa pagbayluhanay sang mga lupok.
Pasalig naman sang Punong Barangay nga magahatag man sila sang nagakaigo nga bulig sa pagpatigayon sang programa kaangay nalang sa pagpakaon sa mga kabataan.
Dugang pa sang Punong Barangay nga ipaathag man sa mga kabataan nga sibilyan sa programa, nga indi ang mga ini dapat magkakulba kun may mga nagapadulong nga militar sa ila nga lugar.
Suno kay Trimucha sa kabug-usan nga 308 nga populasyon sa Sitio Balik-Balik, indi magnubo sa 100 ang mga indibidwal nga nagbakwit kasunod sang pagbayluhay sang lupok kag karun nakabalik na sa ila nga mga puluy-an.
