Ginpahayag ni Bacolod City Mayor Evelio “Bing” Leonardia nga indi nila pag-iprejudge si Atty. Adrian Arellano, nga nagpungko bilang bag-o nga officer-in-charge sang Comelec Bacolod humalin kahapon tubtob Setyembre 25 apang handa sila gihapon nga magbantay para sa kawsa sang ciudad.
Madumduman nga una na nga nagsulat si Leonardia kay Provincial Comelec Officer Atty. Fatima Aspan nga gina pa inhibit ini sa pagpungko sa Comelec Bacolod bangod anay nagaserbisyo ini sa idalum ni former Congressman Albee Benitez.
Sa interview sang Bombo Radyo kay Leonardia, ginpahayag sini nga tanan ang nakahibalo nga malapit si Aspan kay Benitez kag madamo na nga hitabo nga nila napamatud-an ang ila mga suspetso.
Suno sa iya, humalin sang temporaryo nga nagpungko si Aspan, nagdagsa gilayon ang mga pangayaw nga luyag magparehistro kag makabig ini nga unusual.
Ginpakigbahin man sini nga may mga nagaparehistro nga nagafill-out sang form apang wala nakahibalo kun diin siya nga barangay kag anu na ini kadugay nga nagapuyo gani ginaabisuhan lang nga palagpatan.
Suno diri, ang nagakatabo nga hakutay sa karun ang wala pa natabo diri sa ciudad sadto kun sa diin ang kandidato pangayaw kag ang mga botante ang pangayaw man.
Suno sa iya, indi insakto nga ang mga maboto sa Bacolod ang indi man residente sang ciudad.
Ini ang rason suno sa alkalde kun ngaa nagainsister sila nga mag-inhibit si Aspan kag sa karun nga ini ang nabuslan na ni Arellano, magatinguha kag magapabilin sila sa pagbantay.
Luyag man sini ipaintindi sa mga persona nga nagapahakot nga sila ang sarang nga makasuhan kag indi ang nagsugo sa ila.
