Ginpasalig sang tagpamaba sang Bacolod City Police Office (BCPO) nga nakadeploy na sang mga kapulisan para sa pagseguro nga mapatuman ang gun ban karun nga filing sang Certificate of Candidacy (COC) para sa 2022 Elections.
Suno kay P/Maj. Sherlock Gabana, nagabutang sila sang kapulisan agud magbantay sa mga lugar kun sa diin may-ara sang COC filing agud maseguro ang kalinong.
Nagabantay man ang mga ini humalin aga tubtob hapon sa mga Comelec offices.
Madumduman nga nagmando si Philippine National Police (PNP) Chief General Guillermo Eleazar sang pagpatuman sang gun ban nga sa karun hugot man nga ginapatuman sang BCPO.
Sa pagpatuman, ang mga uniformed personnel lang ang ginapahanugutan nga makakapot sang armas kag ginadumilian bisan pa ang mga authorized gun holders.
Ginpakigbahin man ni Gabana nga naga-implementar man sila sang checkpoint gab-i man ukon aga, apang ang pagtsekyar ang nakabase lang sa plain view doctrine ukon ang makita sang mata.
Pasalig naman sini nga hugot nga ginatsekyar sang kapulisan ang mga nagasulod mismo sa Comelec office.
Paathag sang tagpamaba, nga ang mando sang PNP chief nga gun ban ang para sa kalinong kag kahilwayan sang pagpatigayon sang COC filing.
Panugyan man sini sa mga kapulisan nga hugot nga tumanon ang mga mando kag mensahe man sini sa mga pumuluyo nga sundon nalang ang mga pagpatuman bangod para man ini sa kaayuhan sang tanan.
