Ginkumpirmar sang 303rd Infantry Brigade Commander sang Philippine Army nga wala pa sang lugar sa Negros Occidental nga gindeklarar nga hot spot areas may kaangtanan sa New Peoples Army (NPA) karun nga nagaumpisa na ang filing sang Certificate of Candidacy (COC) para sa 2022 Elections.
Suno kay Brig. Gen. Inocencio Pasaporte, magapatigayon pa sila sang assesment kaupod ang Philippine National Police (PNP) kag Commission on Election (COMELEC) natuhoy sa mga lugar nga mahimo madeklarar nga hot spot areas.
Ginpakamaayo naman sini nga wala pa sa karun sang nareport nga mga election-related violent incidents indi kaangay sa mga hitabo sadtong 2019.
Paathag ni Pasaporte nga sa nakaligad nga mga eleksyon, may mga nagakatabo nga extortion gikan sa NPA sa bahin sang mga nagakandidato.
Pasalig sini nga nakahanda ang militar nga maghulag enkaso makabatun sang report.
Nagamonitor man sa mga kandidato ang mga militar kag kun may matukiban nga may kandidato nga nagasuporta sa rebelde nga grupo, ang mga ini ang pasakaan naman sang kaso sang Philippine Army kag mahimo madisqualify sa eleksyon.
Sa karun, pasalig ni Pasaporte nga matawhay ang pagpatigayon sang filing sang COC sa probinsya.
Nagapakig-angot man ang Philippine Army sa PNP nga sa karun naga-implementar man sang pagpatuman sang gun ban.
