Ginpahayag sang tagpamaba sang Negros Occidental Police Provincial Office (NOCPPO) nga nagmando si PNP Chief General Guillermo Eleazar sa kapulisan kag PNP Drug Enforcement Group (PDEG) nga tutukan ang mga kandidato nga magapalapit sa mga illegal drug syndicates agud magpangayo sang pondo para sa kampanya sa baylo sang proteksyon kun sila ang magadaog.
Sa interview sang Bombo Radyo kay Police Lt. Abegael Donasco, ginpahayag sini nga pagadakpon kag pasakaan sang kaso ang mga kandidato nga magahimo sini.
Suno kay Donasco, wala ini ginatolerar kag indi ini pagpahanugutan sang PNP chief gani nagmando ini nga hugot nga bantayan agud indi makalusot ang nasambit nga mga buluhaton.
Nagaserbi man ini nga paandaman sang mga luyag magpadalagan.
Ginpahayag naman ni Donasco nga sa probinsya sang Negros Occidental, indi madamo ang amu sini nga mga aktibidad.
