Sa pagbisita ni Philippine National Police (PNP) Chief General Guillermo Eleazar sa Negros Occidental Police Provincial Office (NOCPPO) kahapon, ginpahanumdom man sini nga wala natapos sa katinlo sang opisina ang intensified cleanliness policy, kundi kalakip diri ang katinlo sang hanay sang kapulisan kag katinlo sang pungsod gikan sa krimen.
Sa bahin naman sang pagtinlo sa hanay, pahayag ni Gen. Eleazar nga padasigun pa nila ang imbestigasyon sa mga kapulisan nga nagabuhat sang indi husto, kag indi ang mga ini magpangduhaduha nga kakason ang sin-o man nga mapamatud-an nga indi nagakadapat sa trabaho.
Ginpanindugan man sini ang pagpatuman sang faceless and nameless recruitment process kung sa diin ginpalos na ang padrino system ukon palakasan.
Suno diri, kung pagabasihan lang ang referral, wala na sang lugar ang mga pumuluyo nga gusto magsulod sa pagkapulis kag wala sang kilala nga opisyal.
Bangod sini, madamo ang nnagapangita sang ila nga mangin backer sa bisan ano nga pamaagi makasulod lang sa PNP.
Pahanumdom sang PNP Chief nga kung makasulod bilang pulis pinaagi sa kurapsyon, magapadayun lang ang indi husto sini nga buluhaton bisan yara na sa sulod sang organisasyon.
Suno kay Gen. Eleazar, ini man ang rasun kung ngaa ginpalos ang referral, kag kun may ara gihapon sang magapalapit kag magaayo nga ipasulod sa hanay, panugyan sini nga pakadtuon sa iya kag siya ang maga-estorya diri.
Dugang pa sini nga bangod sa sala nga paagi sang recruitment rasun kun ngaa may makasulod nga mga kapulisan nga daw sa wala lang kun magpatay, mga pulis nga abosado kag iban pa.
Suno kay Gen. Eleazar, mahimo nga umpisa palang indi na ang mga ini nagakadapat kag nakasulod lang sa pagkapulis bangod may backer.
Samtang sa pihak nga bahin, sakop man sang programa nga intensified cleanliness policy ang pagseguro nga matinlo ang kumunidad gikan sa mga krimen kaupod na ang iligal nga droga.
Sa tion sang pagpamuno sini bilang Chief PNP, tinutuyo ni Gen. Eleazar nga mapataas pa ang pagkilala sang mga tawo sa kapulisan tubtob sa ang mga ini ang indi na magduhduha nga suportahan kag magakooperar sa mga programa sang PNP.
Natapos ang programa kadungan sang paghatag sang plaque of appreciation sa PNP Chief bangod sa pagbisita kag pagkilala sini sa mga kapulisan sa NOCPPO.
