Nagpanindugan ang iloy sang ginareklamo nga si Zaila Marie Dalida nga wala ini nakahibalo sa ginaalegar pagpang-scam sang iya bata sa mga online resellers kag nakahanda ini nga magbulig agud nga marefund ang kwarta sang mga tagreklamo.
Sa interview sang Bombo Radyo kay Loida Dalida sang Purok Sawmill, Barangay Bata, Bacolod City, nakibot ini sang Lunes sang hapon sang mahibaluan nga madamo ang nagaakusar kay Zaila sa social media nga nagapangscam ini.
Suno kay Loida, ginpangita niya si Zaila agud usisaon angot sa reklamo apang naglakat na ini bangud mahimo suno sa iya nga temprano pa nakita sang iya bata ang post.
Nagreply man si Zaila sa mensahe sang iya iloy nga mahikog ini live sa Facebook kag hingadlan ang mga tawo nga nagpakahuya sa iya sa Facebook.
Nagkadto man sa iya store sa Barangay Mandalagan ang iban nga tagreklamo gani iya nga gin-usisa angot sa transaction sa iya bata apang ginpanindugan sini nga wala man sang mapakita nga proof sang transaction ang mga resellers.
Suno diri, nagatanyag siya sang bulig sa mga nagareklamo kun mahibaluan sini ang kabug-usan sang transaction kag siya mismo ang magaproseso sang refund.
Ginkasubo sang iloy nga Dalida nga nadalahig ini sa iskandalo sang iya bata kun sa diin ginapahayag nga P5 million ang nataban sini nagikan sa mga resellers.
Suno diri, indi na ini magpakita sa Bacolod kun nangscam sila sang P5 million.
Suno sa iloy, indi hamak ang pagguba sa iya sa publiko bangud ginbalandra pa ini sa social media.
