Kalakip ang isa ka police officer sa duha ka persona nga ginpasakaan sang kaso nga frustrated murder may kaangtanan sa pagluthang sa agent sang Philippine Drug Enforcement Agency (PDEA) nga si Jason Yayola sang Oktubre 5 sa Barangay Cabug, Bacolod City.
Suno kay P/Maj Ritchie Gohee, station commander sa Bacolod Police Station 9, ang mga ginkasuhan ang ginkilala kanday Jenelyn Manto, 24 anyos residente sa Barangay 16, Bacolod City kag si Patrolman Jake Salgado sang Purok 1, Magsungay, Barangay Singcang-Airport, Bacolod City.
Pahayag sang station commander nga si Manto amo ang ka-chat sang PDEA Agent rasun kun ngaa nagpadulong ini sa Barangay Cabug.
Nahibaluan nga nangayo sang rescue sa na-abreya nga salakyan ang babayi matapos nga nagpadulong sa isa pa sini ka abyan sa Deca Homes Subdivision, kun sa diin gilayon naman nga nagresponder si Yayola.
Panindugan ni Manto nga indi ini marescue sang iya nobyo nga si Joemie Besa bangod yara ini sa Silay gani kay Yayola ini nagpangayo sang bulig.
Apang sa pagpadulong sang biktima sa lugar, ini ang ginabantayan naman sang gunman nga si Salgado.
Si Salgado ang assigned sa Police Station sa Jaro, Iloilo, apang ini ang wala na makareport sa estasyon sumugod sang Oktubre 1 bangod yara sa idalum sang suspension.
Ginluthang sang patrolman si Yayola sang ini ang mag U-turn sa isa ka merkado.
Ang get-away vehicle sang mga persons of interest ang ginkilala naman nga ginapanag-iyahan sang amay sang nobyo ni Manto nga si Besa nga isa ka criminology student.
Ang tag-iya sang salakyan ang nahibaluan nga isa man ka retired Philippine National Police (PNP) personnel.
Santo sa imbestigasyon sang Police Station 9 kag sa pahayag sang PDEA agent, may nadakop ang mga ini sa Gardenville Subdivision sa Barangay Tangub sadtong Pebrero 2, nga ginkilala kay Romulo Jamantoc.
Ini ang narecoveran sang 50 gramos sang shabu.
Nahibaluan nga ang drug personality nga si Jamantoc ang malapit nga abyan nanday Patrolman Salgado kag sang nobyo ni Manto nga si Joemie Besa.
Ginalantaw nga may kaangtanan sa nangin operasyon ang rasun sa pagluthang sa PDEA agent.
Ang mga suspetsado ang padayun pa nga ginapangita.
Paathag ni Gohee nga pinaagi sa regular filing ang pagpasaka sang kaso bangod duha ka adlaw na ang nakaligad antes makita ang lokasyon sang get away vehicle pinaagi sa CCTV, kag ini ang natinluan na, subong man nga ulihi na nakatuad ang witness.
