Magaresume na sa Lunes ang byahe sang pila ka fastcraft nga nagalayag Bacolod-Iloilo vice versa kasunod sang paghalog sang travel guidelines para sa fully vaccinated travelers.
Suno kay Capt. Ludovico Librilla, station commander sang Coast Guard Station Negros Occidental, nagrequest na ang Ocean Jet sa PCG Iloilo nga magaresume sang byahe sa Lunes.
Sa karon, wala pa nabaton sang PCG Negros Occidental ang request sang Ocean Jet bangud ato subong sa Iloilo port ang barko sang shipping company.
Kadungan sini, ginpasalig ni Librilla nga hugot nila nga ipatuman ang guidelines para sa mga travelers, santo sa gintalana sang tagsa ka local government unit.
Sa idalom sang Executive Order No. 49 Series of 2021 nga gin-issue ni Bacolod City Mayor Evelio Leonardia, ang residente sang Bacolod nga fully vaccinated ang kinahanglan nga may yara sang online BacTrac registration, online health declaration, SPASS ukon travel coordination permit, valid personal ID kag COVID vaccination nagikan sa Bacolod.
Ang residente naman sang Bacolod kag indi taga-Bacolod nga indi vaccinated ang kinahanglan nga magpresentar sang online BacTrac registration, online health declaration, SPASS ukon travel coordination permit, valid personal ID kag RT-PCR test result 72 oras antes ang travel.
Samtang ang indi residente sang Bacolod nga fully vaccinated ang kinahanglan nga may yara sang online BacTrac registration, online health declaration, SPASS ukon travel coordination permit, valid personal ID kag vaccination card nga gin-issue sang DOH, Department of Information and Communications Technology ukon anuman nga qualified nga national ukon foreign government agency.
