Nagpanindugan si Patrolman Jake Salgado, ang person of interest sa pagluthang sa Philippine Drug Enforcement Agency (PDEA) agent nga si Jason Yayola sang Oktubre 5 sa Barangay Cabug, Bacolod City, nga wala ini sang kahilabtanan sa krimen.
Nahibaluan nga si Salgado ang ginpasakaan sang kaso nga frustrated murder kaupod sa babayi nga ginkilala kay Jenelyn Manto, 24 anyos.
Si Salgado ang una nga na-assign sa Regional Police Holding and Accounting Office (RPHAO) sa Police Regional Office 6, kag sa karun na saylo na sa Police Station 3 sang Iloilo, apang ini ang temporaryo nga suspendido sa serbisyo.
Aminado ang person of interest nga kilala sini sanday Jenelyn Manto bangod batchmate nya ini sa college kasubong man ang nobyo sini nga si Joemie Besa, nga sa karun isa ka criminology student nga anay nangin classmate man sini.
Ginpakigbahin ni Salgado nga gina-alegar nga si Manto amo ang tabuon ni Yayola sa Barangay Cabug kun sa diin gintiro ang PDEA agent.
Kasunod sang insidente, ginpadulungan man sa ila puluy-an si Manto para sa interview kun sa diin ginpamangkot man sila sang iya nobyo kun may kilala sila nga pulis.
Bangod sini ang iya nga pangalan amo ang gintuad sang duha bangod mag-abyan sila.
Paathag ni Salgado nga madugay na sila nga wala sang kumunikasyon ni Besa.
Dugang pa sang Patrolman nga indi man sini kilala ang PDEA agent kasubong man ang drug personality nga si Romulo Jamantoc.
Pahayag sini nga ginalantaw sang kapulisan nga nagbalos sila sa PDEA agent bangod sa alegasyon nga malapit nila nga abyan si Jamantoc nga nadakop sa pagbaligya sang iligal nga droga sang Pebrero 2 sa Barangay Tangub, apang panindugan ni Salgado nga indi man sini kilala ang persona gani wala sang rasun nga himuon sini ang krimen.
Ginpaathag man sang pulis nga ang suspension sini bangod sa paghampang sang cellphone samtang yara sa trabaho ang epektibo humalin Oktubre 1 tubtob 31 apang nakapauli ini sa Bacolod sang Oktubre 4 lang isa ka adlaw antes ang pagluthang kay Yayola sang Oktubre 5.
Panindugan sini nga sang natabo ang insidente, yara ini sa ila balay upod ang iya nobya kag iloy.
Dugang pa sini nga bisan si Jenelyn Manto ang wala man sa lugar kun sa diin gintiro ang PDEA agent bangod may CCTV sa trabaho sini nga makapamatuod nga naka-duty ini sa iya trabaho.
Kwestyon naman ni Salgado kun ngaa wala man lang sang may nagcontact sa iya nga naulamid ang iya nga pangalan sa isa ka krimen kag siya pa ang ginatudlo nga gunman.
Luyag man sini kuntani kahapon nga makasugilanon ang hepe sang Bacolod Police Station 9 nga amo ang nagakapot sang kaso, apang wala sa estasyon si P/Major Ritchie Gohee gani nakig-angot ini sa Bombo Radyo agud athagon nga wala ini sang kahilabtanan sa insidente.
Ginareklamo man sini nga bangod sa ginpalayag sa media ang pangalan sini apisar nga siya ang person of interest lamang kag sa panindugan sini nga siya ang inosente, aminado naman ini nga nagahatag ang indi matuod nga akusasyon sang kahuy-anan sa pangalan sini bilang isa ka pulis.
