Ginpanindugan sang isa sa respondents sa kaso nga frustrated murder angot sa pagluthang sa Philippine Drug Enforcement Agency (PDEA) agent nga si Jason Yayola sang Oktobre 5 sa Barangay Cabug, nga wala ini sa crime scene bangod ini ang yara sa trabaho kag mapamatud-an ini sang ila CCTV.
Madumduman nga ginpasakaan sang kaso nga frustrated murder sanday Jenelyn Manto, 24 anyos residente sa Barangay 2, Bacolod City kag si Patrolman Jake Salgado, residente sa Barangay Singcang-Airport, Bacolod City.
Si Manto ang ginapahayag nga nagcontact kay Yayola nga nagaparescue bangod sa naabreya nga salakyan sa Barangay Cabug, samtang si Salgado naman ang ginapahayag nga gunman.
Sa exclusive interview sang Bombo Radyo Bacolod kay Manto, ginpanindugan sini nga sa pagluntad sang insidente, ara ini sa opisina bangod nag-overtime ini kag nakagwa lang kapin alas-7:53 sang gab-i.
Dugang pa sang suspetsado nga makita man ini sa CCTV footage sang ila nga opisina sa Barangay Tangub.
Paathag man sini nga wala man siya nakapangayo sang bulig kay Salgado sang amo nga adlaw.
Suno kay Manto, low battery ang cellphone sini sang mag-out sa trabaho gani makita sa CCTV nga naghulam lang ini sa katrabaho sang cellphone agud makacontact sa iya nga live in partner nga si Joemie Besa antes magpuli.
Aminado naman ini nga nakilala nya si Yayola bangod abyan ini sang iya nga boss.
Dugang pa nga panindugan ni Manto nga nagcommute lang siya sa pagpauli kag wala sang dala nga salakyan indi kaangay sa alegasyon nga ini ang naabriya sa Barangay Cabug.
Gin-ako man sini nga may abyan ini sa Deca Homes Subdivision sa Barangay Cabug, apang wala man ini nakapadulong sa abyan nga ginabilinan sini kun kis-a sang iya alaga nga ido.
Paathag ni Manto nga nakaabot ini sa balay sang iya ginikanan sa Barangay 16 kun sa diin sila nagapuli sang nakaligad pasado alas-8:00 na sang gab-i.
Pahayag sang akusado nga wala ini sang kahigayunan nga macontact si Yayola nga magparescue bangod sa lowbat ang iya cellphone.
Suno diri, nakibot siya sang iya nabatian nga ginlawag ang iya nga pangalan sa Bombo Radyo Bacolod bilang isa sa mga nakasuhan.
Kwestyon man sini kun paano na involve ang iya pangalan kun wala man ini sa crime scene.
Nagahilibion man sini nga ginahingyo nga tul-idon ang pagka-involve sang iya pangalan bangod apektado na sang isyu ang iya pamilya kasubong man ang iya trabaho.
Dugang pa sini nga bisan ano nga extra nga trabaho ang sudlan sini agud may mahatag sa iya nga pamilya gani dako ang epekto para diri ang kahuy-anan nga dala sang pagdalahig sang iya pangalan sa krimen.
Aminado ini nga nagapadayun lang siya sa pagtrabaho kag ginapanindugan lang nga wala ini sang sala kag wala nagapa-apekto, apang indi malikawan nga apektado sa isyu ang iya pamilya.
