Ginpanindugan sang retired Philippine National Police (PNP) personnel nga si P/Chief Master Sgt Jose “Joe” Besa, tag-iya sang gina-alegar get-away vehicle sa pagluthang sa Philippine Drug Enforcement Agency (PDEA) agent nga si Jason Yayola, nga wala sini mapahulam ang iya salakyan kadungan sang pagluntad sang krimen sang Oktobre 5.
Suno diri, nagapungkuon ini sa atubang sang iya nga piso net kag tyangge pasado alas-11:00 sang gab-i sang mag-abot ang van nga puti sakay ang mga PDEA agent.
Ginpakigbahin sang anay pulis nga ginpark sini ang iya itom nga Toyota Corola sa plaza sang Purok Cagaycay, Barangay 2, Bacolod City, kapin 20 metros ang kalayuon gikan sa iya nga ginapungkuan.
Ini agud nga mahapos lang sini nga mapagwa ang salakyan ilabi na nga may pagakadtuan ini pagkasunod nga adlaw.
Natingala naman ini nga ginalingi-lingi sang mga lalaki ang iya salakyan kag gina sandig-sandigan.
Wala naman ini sang ihibalo nga PDEA agents ang mga lalaki bangod wala man ang mga ini naka-uniform kasubong man nga wala sang logo ang van nga ila salakyan.
Natingala ang anay pulis nga nagapangita sang opisyales sang barangay ang mga lalaki apang wala nya na ini ginsapak pa bangod sa pagpinsar nga wala man ini sang kaangtanan sa iya.
Suno kay Besa, wala man ang mga ini nagpalapit sa iya kag ang ginsugilanon lang amo ang isa ka barangay kagawad.
Wala man siya sang ihibalo nga ginsulod man sang mga PDEA agent ang puluy-an sang ginikanan ni Jenelyn Manto nga live in partner sang iya bata nga si Joemie Besa sa Barangay 16 gani wala ini nakahibalo kun ano ang problema.
Pahayag sang anay pulis nga nakagwa gin man ini dala ang salakyan sang Oktobre 5 bangod nagprocess ini sang iya nga retirement kag nakapauli lang kapin alas-8:00 sang gab-i.
Dugang pa sang retired PNP personnel nga man sini ginpahulam ang salakyan bangod siya lang ang nagagamit sini.
Gani kwestyon para kay Besa kun paano naangot sa krimen ang iya nga salakyan.
Paathag sini nga indi siya iligalista kag nagretiro ini sa PNP nga limpyo ang pangalan.
Aminado man ini nga nagakadto sa ila sadto si Jake Salgado, ang ginaalegar gunman, bangod classmate ini sang iya bata.
Samtang wala pa gid sini makita bisan makaisa ang PDEA agent nga si Yayola.
Dugang pa sang retired PNP nga wala man ini sang numero kay Salgado.
