Gin-athag sang secretary general sang United Negros Drivers and Operators Center (UNDOC) nga ikaduha lang nila nga demand ang pagpasaka sang plete.
Paathag ni Diego Malacad nga bilang isa ka people’s organization ang ila prayoridad nga ginaduso amo ang pagsuspende sang implementasyon sang 12 porsyento nga Value Added Tax (VAT), pagpanubo sang E-VAT, R-VAT kag Ad Valorem Excise Tax sa idalum sang Train 1 kag Train 2 nga layi.
Ini agud may obligasyon man ang gobyerno kag indi pag ipalukdo sa mga pasahero ang problema sa pagsaka sang presyo sang gatong pinaagi sa pagpasaka sang plete.
Suno kay Malacad, kun magsaka sang P3 ang plete mahimo nga buhinan na sang iban ang ila nga pagbyahe ukon indi nalang gid maglakat kun sa diin ang mga driver gihapon amo ang mangin makaluluoy sa pagbuhin sang riding public.
Apang bangod wala sang Land Transportation Franchising and Regulatory Board (LTFRB) office sa Bacolod, ginalantaw sang opisyal nga mahimo mangin bulag kag bungol lang ang panawagan sang mga Bacolodnon.
Bangod sini, ginpakamaayo nalang sang UNDOC nga magatukod sang Nationally Coordinated People’s Action para sa mga nagkalainlain nga grupo sa Pilipinas.
Kalakip sa ginalantaw nila nga himuon agud mapamatian amo ang noise barrage ukon caravan kun indi mapahanugutan sa hearing.
Apisar sina, una na nga nakapadala sang Petisyon sa gobyerno nasyonal kaupod sang local federation agud nga magtingob ang tingog sa pagpanawagan.
