Tatlo ka mga eskwelahan sa Western Visayas ang naidentify nga magapatigayon sang limited face to face classes, apang wala sang nakabahin gikan sa syudad sang Bacolod kag probinsya sang Negros Occidental.
Suno kay Hernani Escullar Jr., Information Officer sa Department of Education (DepEd) Region 6, sadtong Setyembre 10, nagpagwa na sang listahan ang DepEd nga 25 ka mga eskwelahan sa Western Visayas ang una nga na-identify.
Apang sini nga Oktobre 19, tatlo nalang ang nakapasar sa pagpatuman kag ini ang ginalakipan sang Mayabay Elementary School sa Barbasa, Antique, Igsoro Elementary School sa Bugasong, Antique kag Lascerna Integrated School sa Mayabas, Aklan.
Pahayag ni Escullar nga may isa ka eskwelahan nga nag-apply sa syudad sang Bacolod kag ini ang Alangilan National High School.
Samtang nag-apply man ang isa ka eskwelahan sa syudad sang Kabankalan, anom sa syudad sang Sagay, duha sa San Carlos City kag duha sa Sipalay City.
Apang bangod sa pagpatigayon sang School Safety Assessment Tool sang Department of Health (DOH) kag DepEd, gikan sa 25 ka mga una nga gin-identify, tatlo nalang ang napahanugutan sa pagpatigayon sang limited face to face classes.
Suno kay Escullar, nagapadayun pa ang assessment kag pag-identify sang DepEd sa mga eskwelahan nga mahimo makapatigayon sang pilot program.
Ang School Safety Assessment Tool amo ang nagatumod sa mga eskwelahan kun ang mga ini ang makasarang sa pagpatuman.
Kabahin assessment tool ang apat ka categories nga ginalakipan sang School Operation Indicators, Teaching Learning Indicators, Well-being Protection Indicators kag Home-School Coordination Indicators.
Suno kay Escullar, kun may isa diri ang indi mapasaran, indi naman ang mga eskwelahan mangin kwalipikado para sa limited face to face classes.
Paathag sang Information Officer nga tuman ka laba sang checklist kag isa sa requirements diri amo nga wala sang pagtaas sa kaso sang COVID-19 sa lokalidad nga nahamtangan sang eskwelahan.
Kabahin man sa requirement ang pagpahanugot sang local government unit (LGU) partikular na sang alkalde, kasubong man ang parent’s consent sang mga estudyante.
Kun wala ang mga ini, indi man mapahanugutan nga makapatigayon sang face to face classes ang isa ka eskwelahan.
