Nagahulat nalang ang Negros Occidental Provincial Government sang go signal gikan sa Department of Health sa pagbakuna sa mga naga-edad 12 tubtob 17 anyos ukon ang pediatric vaccination.
Madumduman nga sang nakaligad nga Biyernes, nagpatigayon na sang vaccination sa nasambit nga sektor gikan sa pilot area sa Metro Manila kun sa diin masobra isa ka libo ang ginbakunahan.
Sa probinsya sang Negros Occidental, madamo naman sang mga kabahin 12-17 age bracket ang nagapamangkot kun san-o maga-umpisa ang pediatric vaccination.
Suno kay Negros Occidental Provincial Administator Atty. Rayfrando Diaz, bisan ano nga oras mahimo nga magpagwa na sang go signal ang DOH.
Pasalig naman sini nga preparado na ang probinsya sang Negros Occidental sa pagbakuna.
Sa karun, nagatipon naman ang tagsa ka mga local government unit (LGU) sa mga syudad kag banwa sa Negros Occidental sang mga datos kun ano ka damo ang populasyon sang mga nasambit nga age bracket.
Ini agud nga makapasa gilayon ang mga ini sang detalye enkaso nga pangayuon sang DOH kag matigan-an sang COVID-19 vaccine.
Dugang pa ni Diaz nga bangod sa madamo sang vaccine ang nabatun sang probinsya, sarang ang mga ini gilayon nga makapatigayon sa pagbakuna sa mga 12 tubtob 17 anyos kun pahanugutan na.
