Nagapati ang pununo sang Commission on Elections Region 6 nga ini na ang katapusan nga tion nga may yara sang extension sa voter’s registration nga magatakop sa Oktubre 30.
Sa interview sang Bombo Radyo kay Director Wilfredo Jay Balisado, nagapati ini nga wala na sang extension sa October 30 nga deadline sang voter’s registration bangud ginpahanugutan na sang Comelec ang isa ka bulan nga hingyo apisar nga Setyembre 30 kuntani ang deadline sini.
Suno kay Balisado, wala ini sang may nakit-an nga order sa Region 6 nga iextend pa ang voter’s registration.
Nagapati man ini nga mas convenient ang ginahiwat nga mga sattelite registrations sa mga malls.
Wala man sang problema suno sa iya ang mga nagapatransfer sang voter’s registration basta nacomply ang requirements sa layi.
Kun pamatyagan naman sang isa ka persona nga indi kwalipikado ang nagpatransfer, sarang man ini nga makafile sang protesta.
Gin-athag man sang regional director nga tubtob nga indi pa magsugod ang campaign period nga Pebrero 8 para sa national candidates kag Marso 5 para sa local, indi pa matawag nga kandidato ang mga nagfile sang COC kundi mga aspirants.
Tubtob nga wala pa man ang campaign period, indi pa makaregulate ang Comelec sang mga advertisements kag posters.
Ginatun-an paman sang Comelec ang mga guidelines kun paano maregulate ang mga advertisements sa social media.
Nagpanugyan ini sa mga aspirants nga magbisita sa Comelec kun magpahimo sa mga posters bangud ini ang dapat compliant man sa layi.
