Kadungan sang nagahilapit nga tigkalalag, naghingyo sang paghangop ang city administrator sang Bacolod angot sa closure sang mga patyo sa Oktubre 30 tubtub Nobyembre 2 bangud sa COVID pandemic.
Suno kay Atty. Joseph Eduard Cuansing, nagahingyo ang city government sang konsiderasyon sang mga pumuluyo bangud sa mandu nga siraduhan ang mga patyo sa Oktubre 30 tubtub Nobyembre 2.
Suno diri, indi pagbuksan ang mga sementeryo, memorial parks kag columbaria agud malikawan ang mass gatherings bangud ginapaabot na ang pagdagsa sang mga tawo nga magabisita sa ila minatay.
Ini na ang ikaduha nga tuig nga sirado ang mga patyo suno kay Cuansing bangud mahapos ang transmission sang coronavirus kun madamo ang mga tawo.
Ginausisa naman sang city government ang mga report nga indi na makit-an ang ginlubngan sang iban nga patay sa Burgos Cemetery.
Suno kay Cuansing, wala pa sila sang pangalan sang patay apang may gintulinan na nga opisina agud nga mag-usisa sini.
May nabaton man sila nga report nga may mga drug addicts nga nagasulod sa Burgos Cemetery gani napahibalo na ini sa mga otoridad kag napatigayon na ang buybust operation.
Suno kay Cuansing, indi naman sarang makabalik sa sulod sang patyo ang mga squatters nga ginpahalin na diri halin sang tinalikdan nga tuig.
Madumduman nga ginpauntat na ang paglubong sa Burgos Cemetery.
