Ginahulat nalang sang provincial government sang Negros Occidental ang approval sang Negros Oriental agud nga makaresume na ang byahe sang Ceres bus sa tunga sang duha ka probinsya.
Suno kay Negros Occidental Provincial Administrator Atty. Rayfrando Diaz, luyag sang Vallacar Transit Inc. nga naga-operate sang Ceres bus nga magresume na sang byahe kun sa diin ang fully vaccinated individuals ang indi na kinahanglan nga magpresentar sang negative RT-PCR test.
Ang kompaniya suno kay Diaz ang may yara sang negosasyon sa provincial government sang Negros Oriental angot sa resumption sang byahe sa duha ka probinsya, apang ginahulat pa nga maaprubahan ini sang pihak nga probinsya.
Suno kay Diaz, dapat duha ka probinsya ang nagakasugot sa travel protocols bangud indi man mahimo nga batunon sang Occidental ang fully vaccinated travelers nga wala sang RT-PCR test samtang magarequire naman ang Oriental sang RT-PCR test para sa mga magasulod sa ila probinsya.
Kun matigayon ang trips suno kay Diaz, point to point lang ang byahe kag indi magpasaka sang pasahero sa dalan agud masiguro ang mga requirements.
Sa una nga bahin sang tuig 2021, malapit na kuntani ang Occidental kag Oriental Negros sa pagkasugot nga magaresume ang byahe apang napaiway bangud sa pagtuhaw sang Delta variant sang coronavirus.
