Nagahulat nalang sang green light ukon go signal ang probinsya sang Negros Occidental gikan sa Department of Health (DOH) may kaangtanan sa pagpatigayon sang pagbakuna sang booster shot sang COVID vaccine sa mga Medical Frontliners.
Nahibaluan nga ginaplastar na sa karun sang DOH ang implementasyon sang pagbakuna sang booster shot gamit ang Pfizer ukon AstraZeneca vaccine sa Pilipinas.
Bangod medical frontliners ang nagapanguna nga nagapangatubang sa COVID-19 cases, ginapakamaayo naman nga sa nasambit nga sektor ini una nga ipatuman.
Suno kay Negros Occidental Governor Eugenio Jose “Bong” Lacson, madamo man sang mga natapikan sang COVID-19 sa mga medical frontliners gani nagakadapat nga sila ang una nga makabenipisyo sa booster shot.
Pasalig naman sang gobernador nga sa tion nga maghatag na sang go signal ang DOH, nakahanda naman sa pagpatuman ang probinsya.
Apang nagalaom ini nga sa tion nga masuguran na ang programa, kadungan man nga magapadala sang dugang nga supply sang bakuna ang National Government.
Ginalantaw sang National Government nga mahimo nga ipatuman ang pagbakuna sang booster shot sa Pilipinas, antes paman magtakop ang tuig.
