Nagpasalig ang deputy for medical sang Bacolod Emergency Operations Center nga wala sang dapat kahangaw-an nga mausik ang bakuna sa house to house vaccination matapos nahibaluan nga naga-expire ang COVID vaccine pila ka oras matapos ini mabuksan.
Suno kay Dr. Chris Sorongon, wala sang dapat kahangaw-an nga mauyang ang bakuna bangud nagapatigayon sila sang masterlisting antes magpadulong sa mga barangay.
Suno kay Sorongon, ang Sinovac vaccine ang single dose lang sa isa ka vial samtang sa Astrazeneca, ginatipon kag ginalista anay ang mga mapavaccine kag kun nagdangat na sa 11 ukon 12, amu na paghatag sang nasambit nga vaccine.
Suno diri, nakahibalo ang mga vaccinator sang protocol kag nagpasalig ini nga ila ginalikawan nga mausik ang bakuna.
Nakabutang sa mobile freezer ukon transport box ang mga vaccine agud mamintinar ang temperatura sini.
Suno sa iya, antes sila magpatigayon sang house to house vaccination, nagacoordinate anay ang mga ini sa barangay agud makuha ang lista kag ang mga nagaduha-duha magpavaccine ang ginakadtuan sang doktor kag ginapaathagan in kaso nga may confusion.
Nagalaom naman ang deputy chief nga malab-ot sang ciudad ang 60 percent sang target populasyon nga mabakunahan sa masunod nga bulan.
