Doblehon sang mga kapulisan ang seguridad sa mga patyo bwas nga adlaw antes ang closure sa Sabado, Oktubre 30.
Halin kaina sang aga, nag-amat-amat na dagsa ang mga tawo sa Roman Catholic Cemetery sa Bacolod kag sa iban pa gid nga mga patyo.
Sa interview sang Bombo Radyo kay Police Col. Thomas Joseph Martir, director sang Bacolod City Police Office, napahamtang na kahapon ang police assistance desks sa mga sementeryo.
Ang police assistance desk ang ginabantayan sang police station nga nagacover sang patyo.
Wala naman sang nareport nga may nagdala sang armas ukon makahulubog nga ilimnon sa sulod sang sementeryo.
Suno kay Martir, doblehon ang seguridad bwas agud masiguro ang safety sang mga nagabisita sa ila mga minatay bangud ginalauman ang pagdamo sang mga magabisita.
Ang pagbantay suno sa iya ang magapadayon tubtub sa November 5.
Kadungan sini, nagpanawagan man ang city administrator sang Bacolod sa mga pumuluyo nga tumanon ang mandu angot sa closure sang mga sementeryo halin Oktubre 30 tubtub Nobyembre 2.
Suno kay Atty. Joseph Eduard Cuansing, may tubtub bwas ang mga residente nga magbisita sa mga sementeryo, ukon sarang man makapapatyo pagkatapos sang Nobyembre 2.
Ang closure suno kay Cuansing ang nagatuyo nga malikawan ang mass gathering.
