77 ka mga pamatan-on nga may comorbidities ang madinalag-on nga nabakunahan sa ceremonial pediatric vaccination sang probinsya sang Negros Occidental kahapon.
Madumduman nga ginpatigayon kahapon sa Teresita Lopez Jalandoni Provincial Hospital sa syudad sang Silay ang opening sang pagbakuna sa mga naga-edad 12 anyos tubtob 18 anyos.
Una naman nga ginbakunahan sa nasambit nga age sector amo ang mga may comorbities.
Ang programa ang ginpangunahan ni Negros Occidental Governor Eugenio Jose “Bong”Lacson.
Madumduman nga una na nga gina-ekspektar nga yara sa 100 tubtob 300 ang mga magapabakuna nga pamatan-on nga may comorbidities apang 77 lang ang nagpadulong sa ospital kahapon para sa pagpabakuna nga nagikan naman sa nagkalainlain nga syudad kag banwa sa probinsya.
Ginalantaw nga naalang-alang pa ang probinsya bangod sang Miyerkules lang napahanugutan ang pagbakuna samtang gilayon naman ini nga ginplanuhan sang Huwebes kag kahapon naman ang implementasyon agud nga mangin simultaneous sa iban pa nga local government units (LGUs) sa pungsod.
Kaupod naman sang mga pamatan-on nga ginbakunahan ang tagsa nila ka ginikanan ukon guardian.
Nahibaluan nga target na sang Negros Occidental Provincial Government nga makabakuna sa edad 12 tubtob 17 anyos, may comorbidities man ukon wala sa maabot nga Nobyembre 5.
Ginaplano naman nga magluwas sa Teresita Lopez Jalandoni Provincial Hospital, magapatigayon man sang pediatric vaccination sa Cadiz City District Hospital kasubong man sa Lorenzo D Zayco District Hospital sa syudad sang Kabankalan.
Nagalaom naman ang provincial government nga madamo pa sang pamatan-on nga 12 tubtob 17 anyos ang magadesisyon nga magpabakuna.
