Ginalauman nga masuguran naman sa masunod nga bulan ang pag-issue diri sa Western Visayas sang driver’s license nga valid sa sulod sang napulo ka tuig.
Sang Huwebes, nagsugod na ang Land Transportation Office sa pag-issue sang driver’s license nga may 10-year validity.
Suno kay Atty. Allan Sacramento, pinuno sang Operations Division sang LTO Region 6, para lang sa National Capital Region ang ginsuguran sang LTO Central Office kahapon kag wala pa sa iban nga rehiyon.
Sa tion nga pwede na makasugod sang issuance ang Region 6 suno kay Sacramento, ang magarenew sang non-professional ukon professional driver’s license ang kinahanglan nga maglabay sa comprehensive driver’s education (CDE).
Ang certification para sa CDE suno kay Sacramento ang sarang nga makuha sa Driver’s Education Center (DEC) sang LTO ukon Land Transportation Management System portal.
Sarang nga makaparehistro online sa portal suno sa iya kag makapaidalom sa refresher course kag makatuon sang mga module.
Suno sa LTO official, ginareview sa CDE ang existing traffic rules and regulations, lakip na ang road safety, agud makahibalo ang mga driver sang mga layi kag luwas nga pagmaneho.
Kun ginkuha ang comprehensive driver’s education sa DEC sang LTO ukon sa LTMS, wala sang bayaran diri ang driver samtang may charge naman kun yara sa private driving schools.
Ang lisensya nga valid sang 10 years ang para lamang sa mga driver nga wala sang traffic violations upon renewal samtang valid naman sang 5 years ang iga-issue sa mga driver nga may traffic violations.
