May gamay nga ginamo kaina sang aga matapos magsulong sa gate sang University of Saint La Salle ang mga registrants nga wala nalab-utan sang numero nga ginpanagtag sang Commission on Elections nga amo lang ang masarangan nga akomodaron kadungan sang ulihi nga adlaw sang voter registration.
Sa interview sang Bombo Radyo kay Police Major Ritchie Gohee, station commander sang Bacolod Police Station, nagpadulong na kuntani ini sa Burgos Cemetery sang nakabaton sang tawag nga may ginamo sa USLS gani gilayon ini nga nagbalik sa unibersidad.
Naabtan ni Gohee nga nagdinaguso sa gate sang USLS ang mga botante nga wala nalab-utan sang numero.
Suno kay Gohee, nagdistribute ang Comelec sang 500 ka numero kag gilayon nga ginpasulod sa gate ang may numero.
Nagreklamo ang wala nalab-utan sang number system kag nagpabutyag sang ila sentimyento nga kuntani naghire ang Comelec sang dugang nga staff kadungan sang last day sang voter registration.
Gilayon man nga nagpaathag si Bacolod City Election Officer Atty. Kathrina Trinio Caña nga indi na madugangan ang mga registrants bangud tubtub alas-7:00 sang gab-i na ang pagproseso sang 500 ka mga tawo.
Bangud sa presensya sang madamo nga mga pulis sa unibersidad, nagkalma man ang mga botante kag nagbiya sa lugar.
