Kadungan sang ika-123 nga selebrasyon sang Al Cinco de Noviembre, gin-engganyo ni Governor Eugenio Jose ‘Bong’ Lacson ang mga Negrense nga maghugpong agud malampuwasan ang anuman nga pagtilaw.
Sa mensahe ni Lacson, ginpanindugan sini nga nagakadapat lamang nga dumdumon ang mga rebolusyunaryo sang Negros Occidental sa pagpanguna nanday General Aniceto Lacson kag Juan Araneta.
Ginpakita sang mga revolutionaries suno sa gobernador nga bisan limitado lang ang resources, naghugpong ang mga ini kag nagtukod sang ideya nga intuon ang mga Spaniards nga dalagko nga kanyon ang ila dala kag nangin madinalag-on man.
Ang subong naman nga away bangud sa COVID pandemic ang indi mahimo ma-bluff ukon malango-lango gani kinahanglan ini nga seryosohon.
Suno kay Lacson, kinahanglan nga hatagan sang pagkilala ang mga baganihan sa karon nga panahon nga amo ang mga frontliners.
Nagpanawagan man ini sa mga pumuluyo nga magsunod sa ginamandu sang gobyerno bangud sa paghugpong sang tanan, malampuwasan gid ang pandemic.
Kaina sang aga, isa ka simple nga programa ang ginpatigayon sa Provincial Capitol Lagoon nga gintambungan sang mga opisyales sang Kapitolyo kag iban nga ahensya sang gobyerno kaangay sang Philippine Army kag Philippine National Police.
Suno kay Police Lt. Abegael Donasco nga nagtiglawas sang Negros Occidental Police Provincial Office, nalipay ini nga mahatagan sang kahigayunan nga mahibaluan kun ano ang kasaysayan sa likod sang selebrasyon sang Al Cinco de Noviembre.
Suno diri, ini ang una nga kahigayunan nga nakatambong siya sa amo nga programa.
