Ginpaathag sang Executive Director sa Emergency Operation Center (EOC) sa syudad sang Bacolod nga nagapabilin gihapon nga yara sa idalum sang Alert Level 4 ang risk level sang syudad, kag ginahulat pa ang sabat sang National Inter-Agency Task Force (NIATF) sa sulat ni Bacolod City Mayor Evelio “Bing” Leonardia.
Paathag ni former City Administrator Em Legaspi Ang, nga ang ginpagwa nga assessment sang Nobyembre 5 nga nagapahayag nga Alert Level 2 ang risk level sang syudad ang gikan sa Department of Health (DOH) Region 6.
Ang assessment ang ginbase sa naganubo nga gate keeping parameters nga ginalakipan sang pagnubo sang 2-weeks growth rate, 2-weeks attack rate kag healthcare utilization rate.
Apang paathag ni Ang nga ang matuman gihapon nga risk assessment amo ang ginpagwa sang NIATF kun sa diin ginbutang sa Alert Level 4 ang Bacolod City sumugod Nobyembre 1 tubtob 14.
Suno kay Ang, magapabilin sa Alert Level 4 ang syudad magluwas nalang kun sabtong sang NIATF ang request sang City Government nga ipanaog ang alert level status.
Madumduman nga nagpadala sang sulat ang alkalde nga nagahingyo nga I-downgrade na ang syudad sa mas manubo nga alert level kag ginlakipan man nila ang sulat sang mga data nga nagapamatuod sa pagnubo sang kaso sang syudad.
Paathag ni Ang nga duha ka semana nga data ang ginabasihan sang gobyerno sa assessment gani nagalaom ini nga magapatigayon sang reassessment ang NIATF sa subong nga adlaw.
Ginpakigbahin ni ang nga gikan sa anay 90 tubtob 80 porsyento nga utilization rate sa mga ospital, yara nalang ini sa karun sa 68 porsyento.
Nagalaum si Ang nga maganubo na ang alert status sang Bacolod City sa maabot nga Nobyembre 15.
Ginpaathag man sini nga indi kaangay sa Community Quarantine Status kun sa diin ginahatagan sang kahigayunan ang mga local government units (LGU) nga magpadala sang apelasyon enkaso may pagpamatok, ang pagpagwa sang Alert Level Status naman ang wala sang ginahatag nga tyansa sa apelasyon.
Bangod sini nagpadala nalang si Mayor Bing sang request sa pag-downgrade sang Alert Level Status.
Paathag sang Executive Director sa EOC nga dako ang kinalain sang duha Alert Level bangod nalakip sa Alert Level 4 ang 10 porsyento lang nga capacity limit sa dine in sa mga restaurant, kasubong man sa religious gatherings, salon kag barbershop samtang 20 porsyento naman ang ginapahanugutan nga makareport sa opisina.
Samtang sa Alert Level 2 naman 50 porsyento ang ginapahanugutan.
Samtang sa Alert Level 4, wala ginapahanugutan sa pagwa ang mga manubo sa 18 anyos samtang ginapahanugutan na ang mga minors sa Alert Level 2.
Paathag ni Ang nga importante nga mapanubo ang alert level status agud makabawi-bawi na ang atun nga ekonomiya.
