Wala na natabangan ang isa ka pulis matapos naluthangan sang isa ka trabahante sa Jesusa Heights Subdivision, Barangay Estefania, Bacolod City kagab-i.
Sa interview sang Bombo Radyo kay Police Major Ritchie Gohee, station commander sang Bacolod Police Station 4, ginkilala ang biktima kay Police Staff Sergeant Benjie Giron, 48 anyos, traffic investigator nga na-assign sa Bacolod Police Station 6 kag residente sang Barangay Granada.
Suno kay Gohee, pasado alas 6:00 sang gab-i sang nagpadulong si Giron sa balaligyaan sang hollowblocks nga ginapanag-iyahan sang iya pakaisa nga si Barnie Palomero agud magpangayo sang volcanic soil.
Pagsulod sini, wala siya nakilal-an sang trabahante nga si Rejie Buatag, 27 anyos, kag residente sang Hacienda Cabanbanan, Talisay City kag may nagluntad nga mainit nga paglalisay sang tunga nila.
Suno sa station commander, hinali lang nga nagkuha sang kutsilyo si Buatag samtang nagabot naman sang 9 mm service firearm si Giron.
Nagpukutay ang duha kag naigo sa tiyan ang pulis kun sa diin ginhingagaw pa dala sa ospital apang gindeklarar na nga patay, alas 8:20 sang gab-i.
Narecover sa crime scene ang kutsilyo sang suspetsado.
Nahibaluan nga isa ka personnel sa Bureau of Jail Management and Penology (BJMP) ang asawa sang biktima nga kaupod man sini sa pagpadulong sa lugar.
Sa karun yara sa kustodiya sang Bacolod Police Station 4 si Buatag kag natalana nga pasakaan sang kaso.
Samtang, ginpanginwala naman sang suspetsado nga wala siya sang kutsilyo kag ang pulis lamang ang may armas sa ila.
Sa panaysayon ni Buatag, nagsulod si Giron sa balaligyaan sang hollow blocks kag nagpamangkot kun may inayag nga balas kag iya ini ginsabat nga mamangkot siya anay sa iya amo.
Suno sa iya, naglakat si Giron, nagbalik kag hinali lang ini nga gintampa sang makaduha ka beses kag nagbunot sang armas luthang.
Suno diri, nag-agaway sila nga duha kag didto na naglupok ang armas luthang kag naigo sa tiyan ang biktima.
Panindugan sini nga nagadepensa lamang siya kag wala man siya kuntani sang tuyo nga magbato sa suspetsado.
Gindugang man sini nga ginbuligan niya pa si Giron sang siya ang matumba.
Nagpangayo si Buatag sang pasensya kag ginpahayag nga indi sini luyag ang natabo.
